آســـفين يـا ريـــس . . . "على إيه … مش عارف"
  قالوا اسفين يا ريس ونسوا يقولوا اسفين يا شهيد ، قالوا اسفين يا ريس لكن الريس ماقالش اسف يا شعبى ، مش برده الريس هو اللى هان الشعب وبهدله وجوعه ، مش هو الريس اللى حبس شباب مالهومش ذنب تحت اسم مكافحة الارهاب واعتقلهم بدون محاكمات ، ورفع الاسعار ونسى يرفع المرتبات وقسم خير البلاد ونهب كل الثروات ، وذل اهالينا وضيع امانينا عين المهندس زبال وشغل الدكتور طبال ، وشغل الطبال فى امانة السياسات وخلى جمال رئيس البلاد ، وسرور يفصل قوانين على مقاس حبيب الملايين ، وخلى سوزان ماما وخلى حبيب بابا ، وخلى حياتنا سكر زيادة وضغط اصبح عادة والسرطان داء الغلابة ، ناس فى القطر اتحرقت وفى البحر غرقت ، وفتنة طائفية والفول والطعمية بدل اللحمة والملوخية ، والرشوة سموها عمولة والواسطة اصبحت غولة ، ولما الشباب حب يتكلم ويعبر واتظاهر فى التحرير امر حبيبه يقتل شعبه اللى كان بيعتبره عبيده ولما اتنحى دلوقتى بتقولوا اسفين يا ريس … مش مكسوفين